اليوم مسافر! قصدي اليوم مروٌح ! جيت على عمان اكم يوم عشان عرس اختي! و شو بدكو بالطويلة؟؟ كان كل شي تمام لحد ما حماتها اعطتكو عمرها! انجلطت بالفاردة و الله اخد اوداعتو مبارح! قضاء و قدر! بس انو فقسة جامدة لشهر العسل كانت! اللي كنت متوقعو صار كمان! كل الناس بدهم يلاقولي عروس! الكل متضايق اني اعزب! مش فاهم وين المشكلة! أنا زلمة ما بدي اتجوز هسا! بس طالما هم حاسسين اني اَي كان افورد ات! فهدا سبب كافي! المهم صرت كل ما حدا يورجيني وحدة من هالصبايا الامامير، احس بتأنيب ضمير! انو بكون جاي ع بالي اروح اعتذر للبنت ! و المصيبة انو البنات اللي انا عيني عليهم! ما حدا اتبرع و حاول يوفق روسنا بالحلال! ما علينا!

بما اني وصلت يوم الحفلة! فما لحقت اروح اكل فلافل و فول! فحشرت حالي لبعد ما خلصنا رقص! و اركااااااااض على ابوجبارة! اللي عملتو هناك بقدر اختصرو بكلمة وحدة!

كان "تشنيع"... صحيت ببيت اهلي تاني يوم! و زي زمان الزبط! ريحت القهوة اللي ماما بتعملها ل بابا هي اللي كانت كل يوم تصحيني! و تيجي ماما تحكي نفس الحكي كل يوم! كل صبح! "أنا اسفة يا ماما صحيتك؟ ناملك كمان شوي! و لا تقوم تشربلك فنجان قهوة مع بابا؟ خليه يشوفك قبل ما يطلع"

هاي الزيارة كانت غير! انا حاسس حالي غير! و حسسيت عمان غير! و الناس غير! يا خسارة ما قدرت اشوف كل حدا! بس شفت احلى شباب بعمان، و عملنا نفس الاشياء القديمة، اللفلفة بالسيارة! و دعم الصناعات المحلية! و كمان شفت احلى بنات بعمان كمان! بنات البلد! انو على الاقل لما تعصب عليها و تفلت اكم كلمة مادباوية! بتفهم عليك و بتتصرف على هالاساس! مش زي الاجنبيات! بتنسى الطوشة و ليش معصب و بتنسى شو القصة! انتا و ياها بتلتهو بالترجمة! قلق صح؟!   (شو ترجمة "مش طايق حالي" بالمناسبة؟)

براسي كتيير قصص احكيها! بس مستعجل!

مفكر ارجع ع عمان! لانها كل مرة بزورها بحن الها اكتر! بس في الاَخر ببطل! لأنو الاسباب اللي طفشت منها لسا موجودة! و الحياة عنا ابدا مش سهلة!  و سلامت خيركم

لنا لقاء